Published on Sat, 08/06/2011
വാഷിങ്ടണ്‍: സിറിയയില്‍ 2000ത്തിലധികം സിവിലിയന്മാരുടെ മരണത്തിന് രാജ്യത്തെ ഭരണകൂടം ഉത്തരവാദിയാണന്ന് യു.എസ് സ്‌റ്റേറ്റ് സെക്രട്ടറി ഹിലരി ക്ലിന്റന്‍. സിറിയന്‍ പ്രസിഡന്റ് ബശ്ശാര്‍ അല്‍ അസദിന് രാജ്യം ഭരിക്കാനുള്ള നിയമപരമായ എല്ലാ അവകാശങ്ങളും നഷ്ടപ്പെട്ടതായും അവര്‍ പറഞ്ഞു. വാഷിങ്ടണില്‍ കാനഡയുടെ സ്‌റ്റേറ്റ് സെക്രട്ടറിയുമൊത്ത് നടത്തിയ സംയുക് വാര്‍ത്താ സമ്മേളനത്തിലാണ് അവര്‍ സിറിയന്‍ ഭരണകൂടത്തിനെതിരെ ആഞ്ഞടിച്ചത്. ഹമായില്‍ കഴിഞ്ഞദിവസം നാല്‍പതിലേറെ ആളുകള്‍ കൊല്ലപ്പെട്ട സാഹചര്യത്തിലാണ് ഹിലരിയുടെ പ്രസ്താവന.
'ഞങ്ങളെല്ലാവരും കഴിഞ്ഞദിവസത്തെ യു.എന്‍ രക്ഷാസമിതി പ്രസിഡന്റിന്റെ പ്രസ്താവനയെ പൂര്‍ണമായും പിന്‍താങ്ങുന്നു. സിറിയയില്‍ നടക്കുന്ന എല്ലാ തരത്തിലുള്ള മനുഷ്യാവകാശ ധ്വംസനങ്ങളെയും അപലപിക്കുന്നതാണത്'-ഹിലരി പറഞ്ഞു.
സിറിയയില്‍ സിവിലിയന്മാര്‍ക്കെതിരെയുള്ള അതിക്രമങ്ങള്‍ എത്രയുംവേഗം അവസാനിപ്പിക്കണമെന്നും അവര്‍ ആവശ്യപ്പെട്ടു. സിറിയന്‍ ജനതയുടെ ജനാധിപത്യപോരാട്ടങ്ങള്‍ക്ക് നല്‍കുന്ന പിന്തുണ തുടരുമെന്നും അവര്‍ പറഞ്ഞു.
Leave a comment