Published on Thu, 09/22/2011
വിയന: സമാധാനപരമായ ആണവോര്‍ജ പദ്ധതി ഇറാന്റെ അവകാശമാണെന്നും അതിന്റെ പേരില്‍ ഇറാനെ ഭീഷണിപ്പെടുത്താന്‍ ഏതാനും രാഷ്ട്രങ്ങള്‍ നടത്തുന്ന നീക്കം അപഹാസ്യമാണെന്നും ക്യൂബയും വെനിസ്വേലയും യു.എന്‍ ജനറല്‍ അസംബ്ലിയില്‍ വ്യക്തമാക്കി. ആണവായുധങ്ങള്‍ വികസിപ്പിക്കുകയും സംസ്‌കരിക്കുകയും ചെയ്തുവരുന്ന സമ്പന്ന രാഷ്ട്രങ്ങളുടെ ക്ലബാണ് ഇറാനെതിരെ കണ്ണുരുട്ടുന്നതെന്ന് ക്യൂബന്‍ പ്രതിനിധി ജുവാന്‍ കാര്‍ലോസ് കുറ്റപ്പെടുത്തി. ഈ ക്ലബ് വികസ്വര രാജ്യങ്ങളുടെ പുരോഗതിക്ക് വിഘാതം സൃഷ്ടിക്കുകയാണെന്നും അദ്ദേഹം പറഞ്ഞു.
ഇറാന്, സിറിയ തുടങ്ങിയ രാഷ്ട്രങ്ങള്‍ക്കെതിരെയും അമേരിക്കയും സഖ്യ രാഷ്ട്രങ്ങളും ഐക്യരാഷ്ട്രസഭയെ ദുരുപയോഗം ചെയ്യുകയാണെന്നായിരുന്നു വെനിസ്വേലന്‍ പ്രതിനിധി അലിസി ജീസസ് ഉയര്‍ത്തിയ വിമര്‍ശം.
വന്‍തോതില്‍ ആണവായുധം സംഭരിച്ച ഇസ്രായേല്‍ മേഖലക്ക് വന്‍ ഭീഷണി ഉയര്‍ത്തുന്നതായി സിറിയ കുറ്റപ്പെടുത്തി. എന്നാല്‍, ഇസ്രായേലി നീക്കങ്ങള്‍ക്ക് ഒറ്റപ്പെട്ട ഇറാന്റെ സമാധാനപരമായ പദ്ധതിയെ ഭീഷണിയായി മുദ്രകുത്താനാണ് അമേരിക്കന്‍ സഖ്യത്തിന്റെ ശ്രമമെന്ന് സിറിയ കുറ്റപ്പെടുത്തി.
Tags:
ഇറാൻ
Leave a comment