Published on Fri, 06/10/2011 -
അബൂദബി: ലിബിയന്‍ പ്രസിഡന്റ് കേണല്‍ മുഅമ്മര്‍ ഖദ്ദാഫിയുടെ ദിനങ്ങള്‍ എണ്ണപ്പെട്ടുകഴിഞ്ഞെന്ന് യു.എസ് സ്‌റ്റേറ്റ് സെക്രട്ടറി ഹിലരി ക്ലിന്റന്‍. ലിബിയക്കെതിരെ രാഷ്ട്രീയവും സാമ്പത്തികുമായ സമ്മര്‍ദം ചെലുത്താനും അവര്‍ അബൂദബിയില്‍ ചേര്‍ന്ന സഖ്യരാഷ്ട്രങ്ങളുടെ കൂട്ടായ്മയായ ഇന്റര്‍നാഷനല്‍ കോണ്‍ടാക്ട് ഗ്രൂപ്പിനോട് ആഹ്വാനം ചെയ്തു. ഇപ്പോള്‍ സമയം നമ്മുടെ കൈയിലാണ്, ഖദ്ദാഫിയുടെ ദിനങ്ങള്‍ എണ്ണപ്പെട്ടുകഴിഞ്ഞു -അവര്‍ പറഞ്ഞു.
ഖദ്ദാഫിക്കുശേഷമുള്ള ലിബിയയിലെ ഭരണകൂടങ്ങളെയും സൈനിക നീക്കങ്ങളെയുംപറ്റി ഇന്നലെ കോണ്‍ടാക്ട് ഗ്രൂപ്പ് ചര്‍ച്ചചെയ്തു. യോഗത്തില്‍ നാറ്റോ അംഗരാഷ്ട്രങ്ങള്‍ക്കൊപ്പം അറബ് ലീഗിലെ അംഗങ്ങളായ ജോര്‍ഡന്‍, കുവൈത്ത്, ഖത്തര്‍ എന്നീ രാജ്യങ്ങളും യു.എന്‍ പ്രതിനിധികളും പങ്കെടുത്തു.
പട്ടാളക്കാരെ ലൈംഗികമായി ഉത്തേജിപ്പിക്കുന്നതിന് അവര്‍ക്ക് മരുന്നുകള്‍ വിതരണം ചെയ്ത് ബലാത്സംഗത്തെ ഒരു യുദ്ധമുറയായി സ്വീകരിച്ചുവെന്ന ആരോപണം ലിബിയന്‍ സര്‍ക്കാറിനെതിരെ അന്താരാഷ്ട്ര ക്രിമിനല്‍ കോടതിയില്‍ പരിഗണനയിലിരിക്കെയാണ് പുതിയ രാഷ്ട്രീയ സമ്മര്‍ദങ്ങളുമായി സഖ്യകക്ഷികള്‍ രംഗത്തെത്തിയത്.
ലിബിയയില്‍ സൈനിക സമ്മര്‍ദം നേരത്തേയുണ്ട്. അതിനിടെ, ലിബിയയില്‍ ഇന്നലെയും അക്രമസംഭവങ്ങള്‍ റിപ്പോര്‍ട്ട് ചെയ്യപ്പെട്ടു.
ഖദ്ദാഫിയുടെ സൈന്യം മിസ്‌റാത്ത നഗരത്തില്‍ നടത്തിയ ആക്രമണത്തില്‍ പത്ത് വിമത പോരാളികള്‍ കൊല്ലപ്പെട്ടു. റോക്കറ്റുകളും ടാങ്കുകളുമടക്കം വന്‍ സന്നാഹത്തോടെയാണ് സൈന്യം ആക്രമണം നടത്തിയതെന്ന് പോരാളികളുടെ വക്താവ് ഹസന്‍ അല്‍ ഗലായ് പറഞ്ഞു.
Leave a comment